Uyu magani bawuca bagira ngo bumvishe umuntu ko nubwo yaba yanga ubutegetsi ate , amagambo ye yo kubutuka no kubusebya atari byo byabukuraho, ko ahubwo nareba nabi ari we uzabigwamo! Nibwo bamubwira bati: “Uritonde nta nduru irwana n’Ingoma”! Imvano yawo ni ingoma Urukatsa rwambuye Ibigina mu rwimo rwa Yuhi Gahindiro nko mu mwaka wa 1746.
Semugaza ajya kunesha Ibigina, babanje kurwanira i Rubona rwa Gihara muri za Runda. Baharwaniye iminsi igera kuri ine ingabo z’ibwami n’izitwa Urukatsa za Semugaza zirabatsinsura, zibageza ku Rugogwe rwa Kinyambi ahitwa mu Nkoto. Aho ni ho hari “inkoto” (inkoto ni bariyeri mu Kinyarwanda gakondo) yimiraga ubushita bwari bwarafashe akarere ko hakurya ya Nyabarongo maze Mibambwe Sentabyo abuhungira za Rukoma ku buryo nta muntu uvuye mu Burasirazuba bwa Nyabarongo wagombaga kurenga ku Nkoto ya Kinyambi. Ingabo za Semugaza zongera kubakubita inshuro ndende zibageza ku Kivumu cya Mpushi na Nyarenga ariko ho baharwanira amezi atandatu. Hanyuma urukatsa rubambura ingoma bagendanaga bayivuza bavuga ngo: “Rubanda nimuvune umwami”!
Nuko rubanda rugufi rumaze kumenya ko Gahindiro ari we mwami, rubavaho basigarwaho n’abakomeye. Ibigina bimaze kubura iyo ngoma bikajya bivuza induru bigira biti: “Rubanda nimuvune umwami”! Bamaze kuneshwa nibwo hadutse umugani uzwi na rubanda rwose ugira ngo: “Induru ntirwana n’Ingoma”. Ubwo Semugaza n’ingabo ze Urukatsa bakomeza guhashya ibigina babigeza i Mwendo ya Kiryango mu Kabagari. Bamaze kuhabageza rubanda bose babavaho, basigara bonyine batagira kivuna.
Naho rero iriya ngoma Ibigina byahoze bivuza igatuma rubanda rubavuna; ubwo Urukatsa rwayibamburaga byagaragaje ko abantu bavuna aho ingoma iri, batavuna aho induru ivugira! Ni ukuvuga ko Ingoma itsinda induru!
Mbese mu buryo buzimije; ni ukuvuga ko amagambo cyangwa urusaku atari byo bitsinda ubutegetsi buriho ko ahubwo ubutegetsi butsindwa n’ubundi butegetsi. Iyo bitabaye ibyo ubutegetsi ufite ubushobozi bwo gucecekesha no gucubya uwagerageza kuburwanya akoresheje amagambo n’urusaku gusa! Umuntu utumva ibyo ni we bacira umugani uyu mugani bati: “Erega nta nduru irwana n’ingoma”! Induru ntirwana n’ingoma: Ubutegetsi burusha imbaraga ababurwanisha amagambo n’urusaku byonyine.
